常見護膚品防腐、致敏化學物 你要留心!

想知邊啲係護膚品常見防腐/致敏化學物?

25 October 2016

轉季想換過一套新嘅護膚品? 咁以下內容你要特別留意喇。入秋後天氣乾燥,好多人都會注重皮膚保濕,轉用新面霜、潤手霜、潤膚露、沐浴露等等。皮膚科醫生認為個人護理產品中嘅防腐劑同其他有害化學物係導致種種皮膚問題嘅主因,而最常見係過敏。

買左唔啱用嘅產品,錢都係其次,最慘係出現乾燥、甩皮、角質變厚、痕癢、泛紅或刺痛等過敏症狀。而防腐劑同致敏化學物都有好多種類,所以買新產品之前,就算產品宣傳寫明「不含防腐劑」,都記得要停一停,睇一睇,睇清楚成份係咪真係無相關防腐化學物。

以下係一啲常見防腐/致敏化學物大家要特別留意產品標籤有無呢啲成分: (咪俾啲深奧化學名嚇親就唔理呀!)    

 

個人護理產品常用嘅防腐化學物: 

苯甲酸( Benzoic acid), 山梨酸(Sorbic acid), 羥基苯甲酸(Parabens) , 例如對羥基苯甲酸甲酯(Methylparabens), 水楊酸(Salicylic acid),  苯氧乙醇(2-phenoxyethanol), 苯甲醇(Benzyl alcohol), 甲醛(Formaldehyde)

 

甲醛釋放劑類防腐劑(Formaldehyde Releasing Preservatives):

季銨鹽-15 (Quaternium-15), DMDM 乙内酰脲(DMDM hydantoin), (羥甲基)(Diazolidinyl urea)咪唑烷基脲,咪唑烷基脲(Imidazolidinyl urea)

 

常見沐室個人護理用品嘅防腐化學物:

甲基氯異噻唑啉酮(Methylchloroisothiazolinone) ,  甲基異噻唑啉酮(Methylisothiazolinone) 。呢啲防腐化學物唔可以用於免沖洗式護理產品,例如面霜、潤膚露等

 

常見致敏化學物:  

檸檬醛(Citral), 苯甲醇(Benzyl alcohol), 香豆素(Coumarin), 肉桂醛(Cinnamal), 苧烯(Limonene), 香茅醇(Citronellol), 苯甲酸芐酯(Benzyl benzoate), 芳樟醇(Linalool), 香葉醇(Geraniol), 肉桂酸芐酯(Benzyl Cinnamate).

 

真係唔好彩用左懷疑過敏產品點算好? 

  • 先暫停使用懷疑過敏產品
  • 使用溫和清潔產品,保持過敏皮膚清潔
  • 喺屋企自己測下過敏源,將懷疑產品連續幾日塗喺前臂內側,確定係咪過敏
  • 做實驗,確認係咪新產品同某款舊產品相衝突,可以喺接近面部肌膚質嘅頸部小範圍做測試
  • 帶埋懷疑過敏嘅產品包裝標示睇醫生,搵出過敏病因